काय, किती व का घ्यावे ? आयुर्वेदानुसार शंका समाधान

फलवर्ग

फळे ( Fruits ) भाग 7

घरी फळांचा रस काढण्याबद्दल थोडेसे –

• प्रथमतः फळे ताजीच घ्यावीत. फळावरील किटकनाशक इ चे अंश भरपूर पाण्याने धुतल्याशिवाय जात नाहीत. शक्य झाल्यास फळे नळाखाली धरूनच धुवावीत. फळांच्या देठाजवळ, बुडख्याजवळ ही द्रव्ये साचून राहिलेली असतात. ती घासून स्वच्छ धुवावीत.
• साल कडक, टणक, जाड असल्यास ती काढून टाकावी. उदा. जसे संत्रे.
• मऊ सालीच्या फळांची साल काढण्याची प्रायः आवश्यकता नसते. जसे द्राक्षे इ.
• फळातील बी काढून टाकावे अन्यथा रस कडू होतो. ( पण म्हणून बियाविरहित / सीडलेस फळे शक्यतो खरेदी करू नयेत. त्यामुळे हाडांचे रोग , हार्मोनल, वन्ध्यत्वासारख्या समस्या समाजात वाढत चाललेल्या दिसत आहेत. – याचे स्पष्टीकरण पुन्हा केव्हातरी….) ( तसेच कंपन्यांमध्ये असे ज्यूस तयार होत असताना ती बियांसकट टाकली जात असणार, त्याने आलेला कडूपणा नंतर टाकलेल्या साखरेमुळे जाणवत नाही. )
• ज्यूसर, मिक्सर यांची भांडी अलुमिनियम, प्लास्टिक ची नसावीत याची काळजी घ्यावी.
• तयार झालेला लगदा, रस शक्यतो कपड्याने गाळावा.
• हा तयार झालेला रस शक्यतो एक तासाच्या आत घ्यावा. फ्रीजमध्ये ठेवून नंतर काही तासांनी किवा दुसऱ्या दिवशी घेणे योग्य नाही. थंडीमध्ये हा रस २ – ३ तास टिकू शकतो पण उन्हाळ्यात एक तासाच्या वर रस ठेऊ नये तो ताजाच घ्यावा.

फळांविषयी आणखी माहितीसाठी आयुर्वेदीय वैद्य / डॉक्टर सदैव तुमच्या मदतीसाठी तयार असतात. त्यांच्याशी संपर्क साधावा.

फळांविषयी आणखी माहिती आपण पुढील लेखात जाणून घेवू.                        -क्रमशः

                    – वैद्य आनंद कुलकर्णी M.D. (Med. Ayu),

CYEd, DYA, MA (Sanskrit)

अमृता आयुर्वेद पंचकर्म सेंटर, नागेश टॉवर, हरिनिवास, ठाणे प. मो. 9869105594